Աշակերտներու բարեկեցութեան եւ ուսումնական յառաջդիմութեան հանդէպ շարունակական հոգածութեան շրջագիծին մէջ՝ Մեսրոպեան վարժարանի Խորհրդատուութեան եւ ուղղորդման բաժինը (վարիչ՝ պարոն Զաւէն Թղլեան) վերջերս կազմակերպեց զոյգ workshop-եր՝ աշխատանոցներ, մանկամսուրի, մանկապարտէզի եւ նախակրթարանի ուսուցիչներուն համար։
Յաջորդաբար հոգեշարժական եւ խօսքի խնդիրներու մասնագէտներ Նարօտ Խըտըրլարեանի (psychomotor therapist) եւ Սարին Պեքերեճեանի (speech therapist) ղեկավարութեամբ, մասնագիտական զարգացման դասընթացքները կեդրոնացան աշակերտներուն քով հոգեշարժական եւ խօսքի հետ առնչուած խնդիրներու նշաններու կանուխ բացայայտման, ճիշդ ուղղորդման ընթացակարգերը հասկնալուն եւ դժուարութիւններու առջեւ կանգնած աշակերտներուն՝ դասարանին մէջ պատշաճ օգնութիւն տրամադրելու եղանակներուն վրայ։
Ուսուցիչները մասնակցեցան համագործակցային քննարկումներուն եւ ուսումնասիրեցին շարք մը պարագաներ՝ անոնց նկատմամբ անհատական մօտեցումներ մշակելու համար։ Գործնական ուսուցման փորձը ամրապնդեց մեր ուսուցիչներուն կարողութիւնը՝ ներառական եւ արձագանքող ուսումնական միջավայր ստեղծելուն մէջ։
Մեսրոպեանի մէջ ուսուցիչներու շարունակական մասնագիտական զարգացման եւ միջառարկայական համագործակցութեան միջոցով մենք նուիրուած կը մնանք մեր բոլոր աշակերտներուն առաւելագոյն օժանդակութիւնը տրամադրելուն։