Հայ կաթողիկէ Մեսրոպեան բարձրագոյն վարժարանի տնօրէն պարոն Կրէկուար Գալուստի խօսքը վարժարանի 85-ամեակին առիթով Հայրապետական Պատարագի աւարտին, 24 Մարտ 2024, Սուրբ Փրկիչ եկեղեցի, Պուրճ Համուտ
Հայ կաթողիկէ Մեսրոպեան բարձրագոյն վարժարանի անունով կ՛ողջունեմ բոլորդ վարժարանի հիմնադրութեան 85-ամեակի տօնակատարութիւններու բացման առիթով, որ տեղի ունեցաւ այսօր, Հայրապետական Սուրբ Պատարագով:
Գոհաբանութեան ոգիով իմ խորին երախտագիտութիւնս կը յայտնեմ Տանն Կիլիկիոյ Կաթողիկէ Հայոց Ն. Ա. Գ. Տ. Տ. Ռաֆայէլ Պետրոս ԻԱ. Կաթողիկոս Պատրիարքին, որ իր ներկայութեամբ առաջնորդեց այս Սուրբ Պատարագը։ Ձերդ Ամենապատուութիւն, մեզի համար մեծ պատիւ է Ձեզ այստեղ ունենալը այս առիթով: Ձեր անսասան նուիրուածութիւնը հաւատքին, կրթութեան եւ համայնքին՝ կ՛արտացոլացնեն այն արժէքները, որոնք մենք սրբօրէն կը պահպանենք մեր վարժարանին մէջ: Այս Սուրբ պատարագը մատուցելէն բացի, մենք խորապէս երախտապարտ ենք մեր 85-ամեակին նուիրուած ձեռնարկներու Ձեր շնորհած հովանաւորութեան համար: Ձեր աջակցութիւնն ու առաջնորդութիւնը ուժի եւ ոգեշնչման աղբիւր են մեր դպրոցական համայնքին համար:
Եկէք խոնարհենք մեր գլուխները եւ մեր խորին շնորհակալութիւնը մատուցենք Ամենակարողին։ Առանց Անոր աստուածային խնամքին եւ առաջնորդութեան, մենք երբեք չէինք կրնար հասնիլ այս նշանակալից հանգրուանին: Մենք կը հաստատենք, որ Անոր շնորհով է, որ մենք կը շարունակենք բարգաւաճիլ որպէս դպրոցական համայնք՝ ձեւաւորելով միտքն ու սրտերը աշակերտներու այն սերունդներուն, որոնք անցած են ու կ՛անցնին մեր դռներով:
Եկէք յիշենք եւ յարգենք մեր հիմնադիրներուն ժառանգութիւնը. այն ռահվիրաներուն, որոնք զետեղեցին այս հաստատութեան հիմնաքարը 1939 թուականին, գլխաւորութեամբ Տանն Կիլիկիոյ Կաթողիկէ Հայոց Գրիգոր Պետրոս ԺԵ. Աղաճանեան կաթողիկոս պատրիարքին, որուն կիսանդրիին բացումը տեղի ունեցաւ վարժարանի մոտքին, քիչ առաջ, ձեռամբ մեր սիրելի Հոգեւոր Տիրոջ: Անոնց տեսլականն ու զոհաբերութիւնը ճանապարհ հարթեցին դէպի ծաղկուն կրթական եւ հոգեւոր այս ապաստարանը, զոր մենք այսօր կը փայփայենք:
Երբ մենք կը խորհինք մեր դպրոցի պատմութեան 85 տարիներուն մասին, պարտք կը համարնեք յարգանքի տուրք մատուցել անոնց, որոնք առանցքային դեր խաղցած են անոր յառաջդիմութեան եւ յաջողութեան մէջ: Հայր Պօղոս Պզտիկեան, Հայր Պօղոս Արիս, Հայր Մեսրոպ Թերզեան, Հայր Կղեմէս Մալճեան, Հայր Գրիգոր Ղապրոյեան, Հայր Մեսրոպ Ճուրեան, Հայր Եղիա Եղիայեան, Հայր Գէորգ Եղիայեան. Ես իմ սրտանց երախտագիտութիւնս կը յայտնեմ մեծ տեսլականի տէր այս հոգեւորականներուն, որոնք ծառայած են որպէս տնօրէններ տասնամեակներու ընթացքին: Հայ կաթողիկէ Արծիւեան միաբանութեան այս հայրերէն իւրաքանչյուրը, իր ուրոյն ձեւով, նպաստած է մեր հաստատութեան ձեւաւորման՝ խթանելով միջավայր մը, ուր ակադեմական գերազանցութիւնն ու հոգեւոր աճը ներդաշնակօրէն կը գոյակցին:
Անցեալի եւ ներկայի մեր յարգարժան ուսուցիչներուն կը յայտնեմ իմ խորին երախտագիտութիւնս։ Անոնք եղած են այս հաստատութեան սիրտն ու հոգին, գիտելիքի ջահակիրները, որոնք անխոնջ իմաստութիւն փոխանցած են տասնեակ հազարաւոր աշակերտներու:
Յատուկ յարգանքի տուրք պէտք է մատուցուի այն ծնողներուն, որոնք մեզի վստահած են իրենց զաւակներու կրթութիւնն ու դաստիարակութիւնը։ Միասին մենք ստեղծած ենք ամուր կապ մը, որ կը գերազանցէ ժամանակը, ստեղծելով ընտանիքի զգացում մը, որ կը տարածուի մեր դասարաններու պատերէն շատ հեռու:
Աւելին, իմ երախտագիտութիւնս կը յայտնեմ առատաձեռն բարերարներուն եւ աջակիցներուն՝ անհատ թէ կազմակերպութիւն, որոնք իրենց կարեւոր ներդրումը ունեցած են մեր դպրոցի աճին և զարգացման մէջ։ Անոնց նպաստը իսկապէս օրհնութիւն եղած է կրթական մեր համայնքին համար: Առանձնապէս շնորհակալութիւն կը յայտնեմ պարոն Վարուժ Ներկիզեանին, որուն առաջնորդող դերակատարութիւնը հնարաւոր դարձուց Մեսրոպեանի կրթական ենթակառոյցներուն զարգացումը վերջին երկու տասնամեակներուն, ինչպէս նաեւ այն մեծագոյն զօրակցութեան համար, որ ան ցոյց տուաւ մեր ծնողներուն վերջին տարիներու տնտեսական տագնապին ընթացքին:
Եզրափակելով, եկէք մուտք գործենք նոր հանգրուան մը երախտագիտութեամբ լեցուն սրտերով, նոր հնարաւորութիւններու համար բաց մտքերով եւ ոգիներով, որոնք ամրացուած են յարատև հաւատքով, որ աջակցած է մեզի մեր հարուստ պատմութեան ընթացքին: Թող մենք շարունակենք առաջնորդուիլ գիտելիքի լոյսով եւ մեր Տիրոջ սիրով, մինչ մենք կը նաւարկենք դէպի աւելի յուսալի ապագայ:
Փառք Աստուծոյ, եւ թող Անոր օրհնութիւնները շարունակուին Հայ Կաթողիկէ Մեսրոպեան բարձրագոյն վարժարանին եւ անոր նուիրական կրթական համայնքին վրայ:
Մենք հաստատօրէն կը մնանք Տիրոջ եւ լոյսի ծառայութեան մէջ:
Շնորհակալութիւն: