Ծնողական Հանդիպում` Կրթական Բարեփոխուած Ծրագրին Մասին
Fri, 05 Oct 2018
Posted in Official Announcements

Հինգշաբթի, 4 Հոկտեմբերին, Հայ կաթողիկէ Մեսրոպեան բարձրագոյն վարժարանի տնօրէնութեան հրաւէրով կայացան ծնողական հանդիպումներ, որոնց ընթացքին վարժարանի տնօրէնի կրթական հարցերու խորհրդական  դոկտ. Քոլեթ Աուն ծնողներուն ներկայացուց կրթական ծրագրին մէջ գործադրուելիք բարեփոխումները:

Մեսրոպեանի մէջ ընթացք առած է եռամեայ ծրագիր մը, որուն նպատակն  է արմատապէս բարեփոխել դպրոցին կրթական դրութիւնը: Ըստ այդ ծրագրին, այս տարուընէ սկսեալ անգլերէնը պիտի ուսուցանուի մանկապարտէզի առաջին դասարանէն սկսեալ` պահպանելով հանդերձ դպրոցի ֆրանսալեզու ուղղութիւնը, պիտի դասաւանդուի նոր նիւթ մը` “Կենցաղավարութիւն եւ Բարի Վարք”, պիտի ամրապնդուի համակարգչային գիտութեան դասանիւթին նշանակութիւնը` բոլոր դասարաններուն պարագային, զարկ պիտի տրուի ուսուցման մէջ արհեստագիտութեան համարկումին, ինչպէս նաեւ արհեստագիտական նիւթերու եւ “ռոպոթիքս”ի ուսուցումին (գործակցաբար STEM-ի եւ Little Engineer-ի): Էական փոփոխութիւններ պիտի կրեն նաեւ քննութիւններու, գրաւոր ստուգումներու  եւ գնահատականներու նշանակման կարգերը, աշակերտները անհարկի լարուածութիւններէ ձերբազատելու նպատակով:

Սոյն ծրագրի ղեկավարն է Սեն Ժոզեֆ համալսարանի մանկավարժութեան դասախօս, ուսուցման մեթոտաբան եւ ուսուցիչներու վերապատրաստութեան մասնագէտ դոկտ.  Քոլեթ Աուն: Հանդիպումին ընթացքին, դոկտ. Աուն ծնողները իրազեկեց ծրագրի մանրամասնութիւններուն, ինչպէս նաեւ ներկայացուց վարժարանին սպասումները` ծնողներէն, անոր բարեյաջող գործադրութեան համար, այդ ուղղութեամբ կատարելով շարք մը թելադրանքներ:

Մեսրոպեանի տնօրէն պարոն Կրէկուար Գալուստ շեշտեց, որ ծնողներու գործակցութիւնը էական նշանակութիւն ունի կրթական նոր ծրագրի գործադրութեան համար: Ան կոչ ուղղեց ծնողներուն չվարանիլ դիմելու տնօրէնութեան, ծրագրին հետ կապուած դժուարութիւններու հարթեցման եւ առաջարկներու համար: 



HF7A2023_800x533.JPG
354.4 KB
View
HF7A2031_800x533.JPG
361.3 KB
View
HF7A2076_800x533.JPG
312.9 KB
View

Closed For Comments
Name
Title
Comment

  +961 1 260504 / 262955 / 254940          

  [email protected]          

  Bourj Hammoud, Arax street,  Beirut, Lebanon          

Français Armenian