ԲԱՑՈՒԵՑԱՒ ՄԵՍՐՈՊԵԱՆ ՎԱՐԺԱՐԱՆԻ 80-ՐԴ ՏԱՐԵՇՐՋԱՆԸ
Thu, 27 Sep 2018
Posted in Official Announcements | Festivities

26 Սեպտեմբեր 2018-ին Հայ կաթողիկէ Մեսրոպեան բարձրագոյն վարժարանի աշակերտութիւնը, ուսուցչական կազմն ու ծնողները տօնական մթնոլորտի մը մէջ նշեցին  վարժարանի 80-րդ կրթական տարեշրջանին սկիզբը:

Ծնողներուն եւ աշակերտներուն առջեւ արտասանած իր խօսքին մէջ տնօրէն պարոն Կրէկուար Գալուստ դիտել տուաւ, որ նոր տարեշրջանը  Մեսրոպեանի համար յոբելենական է, քանզի անիկա կը զուգադիպի վարժարանի հիմնադրութեան 80-ամեակին, որուն նուիրուած շարք մը ձեռնարկներ տեղի պիտի ունենան: Ան ըսաւ, որ 80-ամեայ Մեսրոպեանը մեծ աւանդ ունեցաւ լիբանանահայ սերունդներու կեանքին մէջ եւ մեծապէս նպաստեց ընկերութեան զարգացումին, որուն ի խնդիր, այս տարուընէ սկսեալ դպրոցին մէջ ի գործ պիտի դրուին շարք մը նոր ծրագիրներ: Պարոն Գալուստ անդրադարձաւ հայեցի դաստիարակութեան կարեւորութեան, դիտել տալով, որ Մեսրոպեանը հաւատարիմ է հայ ազգային, մշակութային եւ հոգեւոր արժէքները սերունդներուն փոխանցելու ուսումնական ուղեգիծին` տիպար մարդ, տիպար հայ եւ եւ տիպար քաղաքացի կազմաւորելու իր առաքելութեան:

Վերամուտին առիթով վարժարանի շրջափակին մէջ կայացած հաւաքին` աշակերտներուն եւ ուսուցիչներուն կողքին զգալի էր ծնողներու մեծաթիւ ներկայութիւնը: Մթնոլորտի ջերմութեան նպաստեց գեղարուեստական ամփոփ յայտագիրը, որ եզրափակուեցաւ ներկաներու ուրախ շուրջպարով: Այնուհետեւ աշակերտները բարձրացան դասարաններ, ուր անոնց կը սպասէին 80-ամեակի առիթով նուէրներ` տետրեր եւ գրենական պիտոյք:

Աշակերտներու թիւով լիբանանահայ մեծագոյն դպրոցը հանդիսացող Հայ կաթողիկէ Մեսրոպեան բարձրագոյն վարժարանը իր 80-րդ վերամուտը կը նշէ բազմաթիւ յաջողութիւններու եւ զարգացման նոր ծրագիրներու խորապատկերին վրայ: Անցեալ տարի վարժարանի ակադեմական եւ արուեստից ճիւղերու 119 աշակերտներ  յաջողեցան պետական քննութիւններուն, յաջողութեան խառն համեմատութիւնը հասցնելով աւելի քան 96 առ հարիւրի: Նոր տարեշրջանին Մեսրոպեանի մէջ գործադրութեան  պիտի դրուի եռամեայ նոր ծրագիր մը, որուն նպատակն  է արմտապէս բարեփոխել դպրոցին կրթական դրութիւնը:



IMG_2526_800x533.JPG
435.1 KB
View
IMG_2528_800x533.JPG
451.4 KB
View
IMG_2554_800x533.JPG
494.2 KB
View
IMG_2584_800x533.JPG
133.4 KB
View
IMG_2592_800x533.JPG
379.5 KB
View
IMG_2597_800x533.JPG
442.8 KB
View
IMG_2634_800x533.JPG
298.4 KB
View
IMG_2643_800x533.JPG
436.7 KB
View
IMG_2672_800x533.JPG
418.7 KB
View

Closed For Comments
Name
Title
Comment

  +961 1 260504 / 262955 / 254940          

  [email protected]          

  Bourj Hammoud, Arax street,  Beirut, Lebanon          

Français Armenian