ԳՆԱՀԱՏԱՆՔԻ ՀԱՆԴԻՍՈՒԹԻՒՆ՝ ՆՈՒԻՐՈՒԱԾ ՏԷՐ ԵՒ ՏԻԿԻՆ ՍՏԵՓԱՆ ԵՒ ՄԱՐԻԱ ՊԷՕՃԷՔԵԱՆՆԵՐՈՒՆ
Երք, 20 Դկտ 2016

Ուրբաթ, 16 Դեկտեմբեր 2016-ի երեկոյեան, Հայ կաթողիկէ Մեսրոպեան բարձրագոյն վարժարանի “Ֆարաճեան” սրահին տեղի ունեցաւ գնահատանքի հանդիսութիւն մը, նուիրուած տիկին Մարիա Պէօճէքեանին եւ պարոն Ստեփան Պէօճէքեանին, Մեսրոպեան վարժարանին մէջ անոնց ծառայութեան աւարտին հանգստեան կոչուելուն առիթով:

Հանդիսութեան նախագահեց Հայ կաթողիկէ պատրիարքութեան օգնական եպիսկոպոս Արհի. Հայր Գէորգ եպս. Ասատուրեան: Ներկայ էին Մեսրոպեանի երկու նախկին տնօրէններ՝ Սուրբ Խաչ եկեղեցւոյ ժողովրդապետ Հայր Եղիա ծ.վրդ. Եղիայեան եւ Հայ կաթողիկէ տնօրէններու խորհուրդի նախագահ, Սուրբ Եղիա – Սուրբ Գրիգոր Լուսաւորիչ եկեղեցւոյ ժողովրդապետ Հայր Գէորգ ծ.վրդ. Եղիայեան, ինչպէս նաեւ Սուրբ Փրկիչ եւ Սուրբ Աւետման եկեղեցիներու ժողովրդապետներ Հայր Պերճ վրդ. Սապէ եւ Հայր Սեպուհ վրդ. Կարապետեան, Մեսրոպեանի հոգեւոր վարիչ Տէր Ռաֆֆի քհն. Յովհաննէսեան, ուսուցիչներ, ներկայ եւ նախկին սաներ ու բարեկամներու մեծ թիւ մը:

Հանդիսավար տիկին Մարալ Հարպոյեան իր բացման խօսքին մէջ ներկայացուց տէր եւ տիկին Պէօճէքեաններուն հետ կապուած յուշեր՝ իր աշակերտութեան շրջանէն, նկարագրելով իր երկու նախկին ուսուցիչներուն մանկավարժական մօտեցումները եւ գնահատելով անոնց համբերութիւնն ու սկզբունքայնութիւնը՝ ուսուցչական գործին մէջ:

Խօսք առին Հայր Եղիա ծ.վրդ. Եղիայեան եւ Հայր Գէորգ ծ.վրդ. Եղիայեան, որոնք Մեսրոպեանի նախկին տնօրէնի իրենց վկայութեամբ վեր բերին համագործակցութեան, պարտաճանաչութեան, սեփական անձին հանդէպ խստապահանջութեան եւ համերաշխական ոգիի յատկանիշները, որոնցմով գործեցին տէր եւ տիկին Պէօճէքեանները՝ վարժարանէն ներս:

Մեսրոպեանի տնօրէն պարոն Կրէկուար Գալուստ շնորհակալութիւն յայտնեց պարոն Ստեփան Պէօճէքեանին եւ տիկին Մարիա Ապունայեան- Պէօճէքեանին, Մեսրոպեանի մէջ առաջինին 42 եւ երկրորդին 32 տարիներու ծառայութեան համար, շեշտելով, որ Պէօճէքեան ամոլը իր անջնջելի դրոշմը հաստատեց վարժարանէն ներս, վարչական եւ մանկավարժական գործին մէջ ներդնելով իր ամբողջ կորովն ու մասնագիտական կարողութիւնները:

Պաշտօնակիցներուն անունով խօսք առաւ Մեսրոպեանի քարտուղարուհի օրդ. Իզապէլ Լեւոնեան, որ սեղմ գիծերով ներկայացուց իր վկայութիւնը տէր եւ տիկին Պէօճէքեաններուն հետ 24 տարիներու համատեղ աշխատանքի փորձառութեան մասին, մաղթելով անոնց բարի եւ երկար տարիներ՝ արդարօրէն վաստակած հանգիստին համար:

Մեծարեալներու ընտանիքին անունով խօսք առաւ տէր եւ տիկին Պէօճէքեաններուն դուստրը՝ Սիլվիա Պէօճէքեան, իսկ հանդիսութեան աւարտին՝ տիկին Մարիա Պէօճէքեան եւ պարոն Ստեփան Պէօճէքեան շնորհակալութիւն յայտնեցին Մեսրոպեանի տնօրէնութեան՝ գնահատանքի այս երեկոյին համար, ինչպէս նաեւ նախկին տնօրէններուն, պաշտօնակիցներուն եւ ընտանիքի անդամներուն՝ անոնց ցուցաբերած զօրակցութեան, գործակցութեան եւ քաջալերանքին համար՝ տասնամեակներ տեւած ծառայութեան ընթացքին:

Հայր Գէորգ եպս. Ասատուրեան դրուատեց Մեսրոպեանի տնօրէնութեան նախաձեռնութիւնը՝ պատուելու հանգստեան կոչուած վարժարանի աշխատակիցները եւ այս առիթով տնօրէն պարոն Կրէկուար Գալուստին հետ միասին, տէր եւ տիկին Պէօճէքեաններուն յանձնեց Մեսրոպեանի տնօրէնութեան գնահատանքի յատուկ նշանակները:

Հանդիսութեան ընթացքին ներկայացուեցաւ Մեսրոպեանի տեղեկատուական գրասենեակին կողմէ պատրաստուած վաւերագրական տեսանիւթը՝ տիկին Մարիա Պէօճէքեանի եւ պարոն Ստեփան Պէօճէքեանի աշխատանքային կենսագրութեան մասին: Գեղարուեստական մասով ելոյթներ ունեցան Մարինէ Հալաճեան (ջութակ), Գէորգ Քէշիշեան (տուտուկ) եւ Էլի Թորանեան (ասմունք):

Հանդիսութեան փակումէն ետք տեղի ունեցաւ հիւրասիրութիւն, Արուեստից վարժարանի տարածքին մէջ:




Փակ է Մեկնաբանութիւններու Համար
Անուն
Վերնագիր
Մեկնաբանութիւն

  +961 1 260504 / 262955 / 254940          

  [email protected]          

  Պուրճ Համուտ, Արաքս փողոց,  Պէյրութ, Լիբանան